رغم التقييمات المختلفة اللي حصلت عليها اللعبة ، لكن مفيش شك ان اللعبة من أضخم ألعاب 2019 من حيث الأفكار اللي تم تقديمها في اللعبة وأسلوب التنقل وطريقة دمج عناصر التواصل الجتماعي ، وبما ان اللعبة بتقدم مستوى جديد من الواقعية وده اللي زود من صعوبتها عشان كدة بنقدملك أهم نصائح تسهل عليك مهمتك في اللعبة.

1- لا تستعجل في تنفيذ المهمات:

بعض النقاد والإعلاميين اللي جربوا اللعبة قبل ماتنزل عشان يقيموها ، وضحوا انهم قضوا حوالي 100 ساعة لعب على مدار أسبوع ونصف لحد ماخلصوها ، ونصحوا بعدم الاستعجال في تنفيذ المهمات لان عالم اللعبة ضخم ومليانبالتفاصيل والمهمات الجانبية ، لازم تاخد وقتك في التجول في عالم اللعبة وعمل المهمات والأنشطة الجانبية لتسهيل مهمتك في اللعبة ولا تشعر بالملل.

2- حاول توصل للفصل التالت بسرعة:

رغم ان النصيحة دي تعارض النصيحة الأولى لكن حاول توصل للفصل التالت بسرعة لانه هتقابل فيه شخصية Fragile اللي هتحكيلك عن قدرتها في التنقل السريع من مكان لمكان عن طريق الشمسية بتاعتها ، وهتسيبلك الشمسية عشان تستخدمها بعد كدة ، غير ان الفصل التالت مليان بالتفاصيل والاحداث الممتعة.

3- حاول تسافر بحمولة خفيفة:

بما ان المهمة الاساسية لـ SAM هي توصيل البضائع ، لازم تكون في إدارة جيدة لطرقة حمل البضائع لان وزن الحمولة بيأثر على SAM وعلى قدرة تحمله ، عشان كدة لازم تحافظ على توازن SAM في السفر عشان متفقدش الحمولة وتعيد المهمة من الأول.

4- اتاكد ان الـ Repair Spray دايما معاك:

مهم انك تسافر بحمولة خفيفة لكن ده مينمعش ان الـ Repair Spray دايما يكون معاك لانك بتسافر لمسافات طويلة والحمولة اللي معاك بتتأثر بأكتر من حاجة من أهمها الأمطار الزمنية ، عشان كدة بعد ماتوصل للمكان اللي هتسلم فيه الحمولة اتاكد انك استخدمت الـ Repair Spray قبل ماتسلمها عشان تحسن حالتها عشان تاخد تصنيف جيد بعد تسليمها.

5- ازاي تتحكم في الحمولة بافضل طريقة وتحافظ على التوازن:

رغم وجود ميزة الترتيب التلقائي عن طريق الضغط على زرار المثلث ، لكن الخاصية دي مش بتراعي حساسية البضاعة واهميتها من حيث قيمتها ، لان وانت بتوصل الحمولة بتتعرض لعوامل كتير منها الأمطار الزمنية زي ما قلنا قبل كدة ودي بتفسد البضاعة ، عشان كدة اتاكد دايما انك تحط البضاعة الاقل قيمة فوق وقدام البضاعة اللي قيمتها اكبر عشان تحميها.

بالنسبة لتوزيع الحمولة بطريقة تسهل حركتك ، يفضل انك تثبت الحاجات الأساسية الخفيفة على الاكتاف والساقين زي 2 من السلالم و حبال التسلق عشان تفضل ثابتة حتى لو SAM وقع ، ورتب الحمولة على الظهر بحيث تكون الحمولة الأخف فوق والثقيلة تكون تحت.

بالنسبة للأسلحة ممكن تشيلها في شنطة الأدوات لتوفير مساحة لباقي البضاعة على الظهر ، أما بالنسبة لقنابل الدم والسوائل ممكن تشيلها في المحفظة المعلقة في البدلة.

ومن المهم اتباع تكتيك معين بالضغط  على L2 و R2 وانت نازل من على منحدر أو ماشي فوق أرض فيها صخور كتير رغم أنها هتخليك أبطء لكن هتخليك متحكم أكتر في حركة SAM ويفضل انك تعمل Crouch في الطرق الغير مستوية للحفاظ على التوازن.

6- حاول ترتاح بعد كل رحلة:

بعد كل رحلة سفر طويل حاول ترتاح فترة في الغرفة الخاصة بيك عشان ترجع مستوى الصحة وقدرة التحمل وتعديل الحالة المزاجية والنفسية لـ BB وده شيئ مهم في اللعبة ، ومن المهم انك تستحمى عشان تستفيد من السوائل المستخرجة من الجسم والدم.

7- السفر السريع مفيد لكن ليه سلبيات:

برغم ان قدرة السفر السريع مفيدة وبتسهل التنقل من مكان لمكان تاني لكن ليها سلبيات ، من أهمها انك مش هتقدر تنقل معاك اي ادوات او حمولة وهتسيب كل حاجة في الغرفة لحد ماترجع مرة تانية ، عشان كدة بننصحك ماتسختدمش الخاصية دي لما تكون في مهمة او معاك حمولة بتوصلها ، لكن ممكن تستخدمها انك تسافر لمكان بعيد عشان تقبل مهمة معينة وترجع مرة تانية.

8- ازاي تزود الـ Likes :

فكرة الـ Likes في اللعبة من الافكار المبتكرة اللي معدتش علينا قبل كدة ودي بتساعدك في انك تعلي قدراتك زي طاقة التحمل والوزن اللي تقدر تشيله وتحسين مستوى اتصالك مع الشخصيات الفرعية في اللعبة ، لكن المهم ازاي تقدر تزودها؟

لما تبني جسر فوق نهر او تحط سلم عشان تتسلق جبل ده بيساعد لاعبين اخرين ممكن يدوك Like ، ولما تحط علامة Sign على مداخل المدن والمباني لتحذير اللاعبين ان المنطقة فيها BTs او تنبيه اللاعبين ان في Shelter قريب ، ممكن يزود الـ Likes.

وتقدر تعمل مهمات جانبية زي توصيل شحنات مفقودة او تعمل مهمات بشروط معينة  ، بمعنى انك توصل الحمولة في وقت معين وبحالة جيدة ماتقلش عنها عشان تعلي التقييم بتاعك وتاخد  Likes اكتر ، ودي بتكون موجودة في قائمة مهمات standard orders بتختار Premium Delivery وتحدد الشروط اللي هتوصل بيها الشحنة سواء حالتها او الوقت اللي توصلها فيه.

كمان تقدر تساعد الشخصيات التانية اللي بتوصل حمولات زي SAM انك تساعدهم في التخلص من النهابين في الطريق ومساعدتهم في التوصيل ، بعدها هيردولك الجميل ويدوك Likes.

9 - حاول تدور على Power Skeleton في أقرب فرصة:

بما ان وظيفة SAM الرئيسية هي حمل البضائع وتوصيل الطلبات لازم تكون القدرة على التحمل وحمل الاوزان في أعلى درجاتها ، عشان كدة حاول انك تلاقي آداة اسمها Power Skeleton اللى بتساعد في حمل وزن أكبر زده هيسهل مهمتك أكتر.

عشان تقدر تلاقيها هتنتظر فتح خريطة Central Region وساعتها هيكون عندك مهمة لربط الـ preppers لشبكة Chiral Network، واحد من الـ PREPPERS اسمه The Engineer موجود في جنوب Lake Knot City وبعد ما تربطه مع الشبكة هيديك أداة Power Skeleton كمكافأة وتقدر تطورها بعد كدة بتقوية علاقتك مع المهندس عن طريق توصيل الشحن المفقودة له ومهمات Standard Orders  الخاصة بيه عشان تقدر تشيل حمولة أكبر(حتى 300 كج) وتستهلك طاقة أقل. وتقدر تطور الأداة لأعلى مستوى بتنفيذ من 6 إلى 7 مهمات توصيل لصالح المهندس.

10- اعمل صيانة لوسائل انتقالك دايما:

أحيانا بتكون المهمات صعبة بسبب ان المسافة طويلة او لان الحمولة اتقل من اللازم ، عشان كدة في مرحلة معينة من اللعبة هتلاقي وسائل انتقال مختلفة زي Reverse Trikes اللي بتماز بالسرعة أو شاحنات.

استخدام وسائل التنقل بيعتمد على البطارية ، عشان كدة لازم تتعلم مهارة بناء المولدات عشان تقدر تشحنها ، وعشان تقدر تحافظ على عمر البطارية لأطول فترة ممكنة حاول تسوق في الطرق السليمة.

بعد فترة من الاستعمال وسائل التنقل بتتعرض للصدأ وبيحصل فيها اعطال بسبب السقوط ، وعشان تقدر تصلحها وترجعها لحالتها لازم تروح لأقرب Safe House أو مركز توزيع وتحط وسيلة التنقل في الاسانسير ، وهنا بيكون قدامك اختيارين 

الأول : انك تبعتها للجراج عن طريق التوجه لـ delivery terminal وتختار Garage من القائمة وهتلاقي وسيلة انتقالك في قائمة Elevator  وبعدها تضغط على زرار X وتختار Store Vehicle وهتلاقي وسيلة انتقالك نزلت في الاسانسير بعد تصليحها وتقدر تسترجعها من قائمة الجراج.

التاني: انك تخلي SAM يرتاح في الغرفة الخاصة بيه وقبل ما يوصل لغرفته هيظهرلك فيديو فيه SAM مع وسيلة التنقل في ورشة بتصلح وسيلة التنقل وترجع البطارية لحالتها.

دي كانت أهم النصائح عشان تساعدك في مهمتك في اللعبة وتخليها مش معقدة ، وفي المقال التاني من اللعبة هنوضحلك ازاي تقدر تحترف القتال في اللعبة وبعض التفاصيل عن خاصية البناء ، تابعونا.