مراجعه الحلقه الأولي من مسلسل البقاء The Last Of Us

مراجعه الحلقه الأولي من مسلسل البقاء The Last Of Us

مراجعه الحلقه الأولي من مسلسل البقاء The Last Of Us

مين كان يتخيل بعد كل الأنتقادات اللي واجهها مسلسل The Last Of Us من اللاعبين بعد ما تم الأعلان عن قايمه الممثلين و قبل حتي ما يتذاع الحلقه الأولي منه انه هيكون واحد من أفضل المسلسلات المبنيه على لعبة فيديو جيم ليها جمهور و عشاق كتير من كل أنحاء العالم!! ودا اللي جينا نتكلم معاكم فيه النهارده في مراجعه الحلقه الأولي.

- مشهد الافتتاحية او بدايه المسلسل يعتبر أول مشهد مظرهش في اللعبه وبصراحه كان ليها تأثير مُرعب علي المشاهد بالرغم من انه مشهد علمي لكن تحس انه بيفكرك بأحداث وقت الكورونا وازاي محدش كان متخيل ان كل دا يحصل وان المرض ينتشر بالشكل دا بسبب استهتار الناس بيه ودا اللي حصل فعلاً في المسلسل.

- من الحاجات اللي أغلبنا كجيمرز مبسوط بيها في المسلسل هو أن بالرغم من التغييرات اللي لاحظناها في الأحداث, الأ أنها بسيطه جداً ومش بتغير حاجه في مجري القصه نفسها بالعكس دي مشاهد أضافيه بتخلينا نفهم أحداث القصه اللي مكانتش واضحه في اللعبه ودي بيكون أسمها Plot holes أو بالعربي كدا ثغرات.

- من النقاط اللي تحسب للمسلسل برضو أنه حتي المشاهد اللي أتغيرت خالص عشان تكون مواكبه لجو المسلسلات لأنه هيكون صعب كل حاجه تتنقل حرفياً وبالنص الأ انه فضل مطابق وصادق تماماً لمحتوي اللعبه ودي حقيقي من الحاجات اللي بتفرق مع أي Fan او مٌحب للسلسله و سبب تاني لفشل أعمال كتير قبل كدا.

- حقيقي الحلقه الأولي نجحت وبجداره و أنصحك كجيمر أو كمشاهد للمسلسل كأول مره أنك تتفرج عليه وتديه فرصه أياً كانت وجهه نظرك اللي كونتها عن المسلسل قبل كدا لأنك هتحس نفس أحساس اللعبه بالظبط, حاله الحزن المسيطره علي الناس بعد اللي حصل أو زي مابيسموه الـ Outbreak وأحساس أن العالم كله في حاله أضطراب وكل شخص بيحاول ينجو بحياته أو أنه حتي يعيش اليوم بيومه علي الأقل.

- كميه الأهتمام بالتفاصيل اللي شوفناها النهارده في الحلقه من الحاجات اللي تحمسك لباقي الحلقات برضو بدايه من الجو العام للمسلسل وطريقه كلام الشخصيات من شخصيه مهمه لشخصيه ثانويه والألتزام بنفس الجمل اللي موجوده في اللعبه و طريقه لبس الشخصيات لحد حتي تحركاتهم مشهد ورا التاني عامل انسيابيه عظيمه ومش بتحسسك انك بتتفرج علي مسلسل خالص بالعكس كأنك بتتفرج علي مشاهد اللعبه نفسها.

- نيجي بقي للشخصيات نفسها وممثلينهم ونبدأ بشخصيه Joel Miller ودا يعتبر من أهم الشخصيات أن مكانش اهمهم كبطل للمسلسل واللعبه واللي بيقوم بشخصيته Pedro Pascal وبصراحه وبدون أي أقوره فا هو قام بالدور فوق الممتاز ولا غبار عليه أطلاقاً لدرجه ان بعد التحول اللي بيحصل للشخصيه لسبب ما بدون حرق احداث فا طبقه صوته بتتغير لنفس طريقه كلام Joel في النص التاني من المسلسل.

- نتكلم بقي عن الشخصيه المثيره للجدل بشكل عام في اللعبه وبشكل خاص في المسلسل وهي Ellie Williams بسبب الأختيار اللي معجبش أغلب مُحبين اللعبه أن مكانش كلهم وهي الممثله Bella Ramsey وكان في حاله توقع كبيره انها هتفشل في الدور وهتكون سبب في فشل المسلسل كمان ولكن كانت المفاجأه هي انها قدمت الدور بمنتهي البراعه وبنفس طباع Ellie في اللعبه وطريقه كلامها.

- لازم نتكلم برضو عن شخصيه زي Tommy Miller اللي بيقوم بيها الممثل Gabriel Luna واللي خطف بدوره الأنظار في أول مشهد ليه ظهر فيه خصوصاً متابعين اللعبه هياخدوا بالهم من نقطه صوته المقارب جداً لصوت Tommy في اللعبه ويكاد يكون طبق الأصل ودا عمل حاله حماس لظهوره اكتر في الحلقات الجايه والجزء التاني هيكون دوره أعمق وهنشوفه بشكل أكبر.

- تفاصيل كتير ممكن نتكلم عنها في الحلقه ولكن لو حبينا ننهي مراجعتنا فا لازم نتكلم عن أخر مشهد في الحلقه واللي بصراحه أتعمل بأتقان جداً بين الممثل Pedro و الممثله Bella اللي بيقوموا بدور Joel و Ellie, وعشان منحرقش التفاصيل للي لسه متفرجش .. لكن كميه المشاعر الموجوده في المشهد دا من سيطره غضب Joel عليه والـ Flashback اللي حصلت من ناحيه , ومن ناحيه تانيه نظره Ellie اللي كلها صدمه و خوف هتفهمك أد ايه الأداء رهيب جداً.
وفي النهايه المسلسل حقيقي جميل جداً وتقييمنا لأول حلقه 9/10 وأنصحك أياً كان أختلافك معاه من حيث مش عاجبك الممثلين او القصه نفسها شاكك في انها مكانتش هتتفذ صح أنك تنسي كل الكلام دا و تديله فرصه وتمشي بالمبدأ دا عامه في اي مسلسل او لعبه او حتي فيلم لأن ممكن بعد ما تتفرج عليها تعجبك جداً وهتكون في الأخر ضيعت فرصه انك تتبسط بعمل ابداعي زي دا .. نشوفكم في مراجعه الحلقه الجايه.

 

منتجات اكثر مبيعا