بعد إنتظار أكتر من 5 سنين بنحصل على فرصة أخيراً خوض تجربة جزء جديد من سلسلة Metro اللي ممكن أقول إنها واحدة من أفضل ألعاب الشوتر في الجيل السابع اللي قدرت وسط كم هائل من ألعاب الشوتر في وقت نزولها و بتكاليف قليلة جداً إنها تثبت نفسها و تبقى لعبة شوتر بهوية مميزة بنقدر نعرفها من أول ما نمسك الكونترولر .. جزئين ميترو 2033 و Last Light كان فيهم حاجتين مميزين جداً الأول هو الatmosphere اللي بيغمسك داخل اللعبة و ده يرجع لرسومياتها الجبارة تقنياً و فنياً .. و قصتها المستوحاه من رواية Metro 2034 اللي هي تعتبر أحد أفضل اعمال Dimitry Glovhosky .. في E3 2017 و مع أول reveal للجزء الثالث Metro Exodus فريق الدعايا كان واعدنا بلعبة هتاخد السلسلة زي ما بيقولوا لWhole new level .. لكن السؤال هنا و بعد أكتر من 35 ساعة لعب هل الجزء التالت فعلاً عرف يكون قد توقعاتنا و ميخونش الهايب اللي عملناه على اللعبة؟ تعالوا نشوف الجزء التالت كان موقعه ايه هنا من الإعراب.

القصة 

هبتدي معاكم بالقصة بدون ما أخوض في أي جوانب ممكن تحرق التجربة على حد .. قصة اللعبة هي تتمة لقصة Metro Last Light و بتدور أحداثها تقريباً بعد سنتين من نهاية الجزء الثاني و هنا في أهداف مختلفة تماماً بيحاول يسعى ليها بطل اللعبة مع الcrew اللي إنضم ليهم و هما The Order بقيادة Miler .. الcrew بيقرر يقوم برحلة و مغامرة طويلة للبحث عن مكان جديد إيماناً و إعتقاداً بإن فيه بشر عايشين في بلاد أخرى خارج نطاق Moscow ممكن يكونوا عايشين بشكل امن بعيد عن الإشعاع النووي و الدمار و المسوخ .. ده تقريباً بشكل عام الفكرة الرئيسية للقصة و عشان لا نفسد على حد التجربة هنقل بالكلام عن الجوانب الفنية في القصة

لما نبص لإسلوب تقديم القصة هنلاقي الcutscenes قليلة جداً و الإعتماد الأساسي في تقديمها هو الجيم بلاي .. من خلال الجيم بلاي انت ممكن تقرر تعرف أسرار و backstory عن شخصيات مثيرين للفضول جداً بالنسبالك .. من خلال الجيم بلاي انت ممكن تسمع محادثة مهمة جداً بين شخصيتين غيرك ميسمعهمش .. من الجيم بلاي بردو انت ممكن تشارك زملائك في الcrew في أفراحهم و أحزانهم بشكل ممتاز بيفكرني بلعبة زي Red Dead 2 .. كل Dialogue بيحصل ليه قيمة و كل شخصية متوظفة صح و واخدة حقها حتى الشخصيات الجانبية بشكل يخليك مرتبط بيهم جداً و تضطر تتأثر بالمواقف اللي بيمروا بيها اللي في بعض الأحيان ممكن أوصفها بإنها gut wrenching.

الجيل ده شوفنا ألعاب كتير Post Apocalyptic بتقدم أفكار ممتازة عالورق لكن التنفيز كان ما بين مستوى سيء و جيد .. أمثال Mad Max أو The Division أو Dying Light .. مشوفناش من لعب زي كده أي محاولة للخروج عن المألوف و تقديم أفكار جديدة تدي قيمة أكبر للعالم ده تخليك تصدقه و تبقى منغمس بأحداث القصة

هنا مع ميترو إحنا ممكن ببساطة نعتبرها اللعبة القياسية للformula دي بدون مبالغة .. الجزء ده إسمه Exodus و معناه الخروج والإسم فعلاً كان إسم على مسمى لإنها كانت بتمثل الخروج من كل شيء .. قصة اللعبة كانت قصة survival بكل ما تعنيه الكلمة بتشوف خلال رحلتك cultists متعصبين جداً بتشوف قبائل تانية و طريقة تعاملهم مع بعض في عالم متدمر زي كده بIdiologies مختلفة تماماً ممكن تتعاطف معاهم و ممكن تكرهم و هيعدي عليك ناس أصبحوا بيؤمنوا بعقائد جديدة بسبب اللعنة اللي حلت عالعام و الدمار ده .. و في وسط كل ده بتشوف أزاي Artyom و Anna بيحاولوا يبصوا بصة مستقبلية و يحلموا بحياة جديدة بعيدة عن المشاكل و موطن امن يوفرلهم جميع إحتياجتهم .. برغم إن القصة و إسلوب عرضها اللي بيفكرني بألعاب زي Half Life و الأهم من كده تماشيها مع تصميم المراحل كانت حاجة ممتازة لكن عندي عليها شوية تحفظات .. للأسف اللعبة للمرة التالتة أرتيوم أخرص مبيتكلمش نهائي .. طبعاً زي الأجزاء القديمة هو بيعلق عالأحداث في الloading screen ما بين كل شابتر و التاني و لكن للأسف ده مكنش كافي نهائي في قصة نقدر نقول عليها قصة شخصيات على عكس الجزئين اللي فاتوا فا هنا صمت أرتيوم كان ليه تأثير سلبي عالقصة انا كنت أتمنى إن اللعبة تتفاداه .. حتى فيه شيء مش مستغل نهائي و هو تعليقات أرتيوم بين كل section في الchapter انت مبتقدرش تسمعها إلا إذا خرجت من اللعبة و فتحتها تاني! فا حاجة زي كده مع الناس اللي بتلعب فترات طويلة بشكل مستمر هيضيع عليهم جزء كبير من تعليقات بطل اللعبة عالأحداث بشكل عام .. اللي كان بيعوض الخلل ده شوية شخصية Anna الحقيقة كانت بتلعب دور البطل في أوقات كتير جداً و كانت شخصية محورية في القصة أكتر من الجزئين اللي فاتوا.

العيب التاني هو الfacial animation .. أنميشن تحريك الوشوش كان بينعدم فيه الحيوية و تحس إنها وشوش بلاستيكية زي الجزئين اللي فاتوا برغم إن فيه تفاصيل رهيبة في وشوش جميع الشخصيات الحقيقة.

الجيم بلاي

اللي منكم تابع الحملات الدعائية للعبة هيبقى عارف التغير اللي إتعرضتله ميترو و إنها مبقتش لعبة خطية Linear زي الأجزاء اللي فاتت .. هنا انا مقدرش أقول عليها بردو لعبة Open World لكن بشكل عام ممكن نقول إن ميترو exodus متأثرة بشكل كبير بتصميم مراحل ألعاب زي Crysis أو الجزء الأول من سلسلة Far Cry بس على نطاق أوسع و أشمل.

اللعبة أه عالم مفتوح لكن مش ضخم عالفاضي لأن كل الأماكن فيه مستغلة و ده هنتكلم عنه بالتفصيل قدام في جزئية الexploration .. بالإضافة كمان إن عالم اللعبة بيتقسم لعوالم مش متصلة ببعض .. بمعنى إن كل شابتر من اللعبة كيان قائم بذاته مختلف تماماً عن غيره من ناحية البيئة و تأثير الحالة الجوية عليها لإنك بتتنقل على مدار أربع فصول السنة فا كان فيه تنوع ممتاز الحقيقة و بيخليك في حالة تأهب لإستكشاف كل عالم من العوالم دي بالإضافة إن اللعبة الإسكتشاف فيها كان Rewarding جداً .. من إسكتشافك لأماكن تحت الأرض و تقابل mutants و تتعرض للradiation و تضطر تلبس الgas mask ده شيء هيرجعك بشكل كبير لأجواء الجزئين اللي فاتوا اللي أغلب فتراتهم كانت تحت الأرض في (أنفاق الميترو) .. بجانب المكائفة المادية انت في أغلب الأوقات اللي بتستكشف فيها هتلاقي نسبة كبيرة من المواد الكيميائية و المعدات اللي هتساعدك تعمل craft لطلقات أكتر أو mid kits أكتر عشان تساعدك على الsurvival .. و أخيراً ممكن تحصل على سلاح جديد تماماً .. فا كان الإستكشاف في اللعبة ممتع جداً و بيضيف قيمة كبيرة لمحتوى اللعبة. 

اللعبة بتتميز بتفاصيل خلابة و فيه إبداع كبير في تصميم البيئات بشكل يخليك متأهب دايماً للإستكشاف

الإستكشاف في اللعبة مكنش تقضية غرض أو إستعراض لقوة اللعبة رسومياً لإن اللعبة مش سهلة نهائي إنها تتلعب بدون ما يكون معاك المواد و المعدات الكافية اللي هتساعدك على تكملة القصة .. و لكن هل الmutants هيسيبوك تستكشف الأماكن المهجورة براحتك بدون ما يشكلوا أي إزعاج؟ أكيد لاء .. و بذكر الmutants لازم نتكلم عن الأسلحة و هنا ممكن أحط 100 خط تحت كلمة أسلحة في اللعبة دي

الأسلحة في اللعبة شبه الجزئين اللي فاتوا من ناحية ميكانيكية التصميم و الشكل .. لكن فيه إختلاف كبير في التوظيف و آلية إستخدامهم  ده بيرجع للحرية الكبيرة في إختياراتك للتعديل عالأسلحة دي .. انت ممكن تحول Shotgun لسلاح أشبه بالBolt Rifle أو ممكن تخلي Rifle تكون سلاح آلي زي الAK 47 .. و بتقدر كمان تطور أسلحتك و تخلي مفعولها أقوى سواء تزود الmagazine أو تقوي الkickback للسلاح و تضحي بميزيات تانية و ده بيبقى على حسب إسلوب لعبك إذا كنت بتحب الstealth أو gun blazing هتوظف أسلحتك على الأساس ده.

ذكرت فوق إستكشافك لأماكن تحت الأرض و البيوت و الكنائس  المهجورة هتقابل mutants مشاكسين كتير .. و هنا انا لازم أعترف إن اللعبة كانت قاضت قوسين أو أدنى إنها تخليني أرمي الدراع في الأرض من الرعب في بعض الأوقات .. اللعبة حرفياً في بعض المناطق بتتحول لhorror game انت مش عارف الأصوات بتطلعلك منين و ايه مصدرها.

بإمكانك إختيار الوقت اللي هتقوم بالمهمة المطلوبة منك فيه .. سواء ليل أو نهار على حسب إسلوب لعبك و المعدات اللي معاك

بالكلام عن الجيم بلاي انا ممكن أتكلم عنه لحد بكرة الحقيقة لكن لازم نذكر بعض العيوب اللي كانت موجودة و أولها مبدأياً هي الذكاء الإصطناعي .. الAI كان عبارة عن 2 levels مختلفين عن بعض تماماً .. الذكاء الإصطناعي للmutants و للبشر .. البشر للأسف الAI كان بيعاني من مشاكل كتير .. المشاكل بتبدي تظهر لما تخش في الcombat و تخرج برا الstealth .. كعادة ألعاب الشوتر للأسف معظم الenemies مبيضربوش عليك نار إلا إذا إستنوا لفترة زمنية كافية إنك تجيب headshot .. يا إما تلاقيهم مركزين في أماكن تانية (محصلتش غير في حالات نادرة الحقيقة) .. و لكن بشكل عام نظام الإختباء للأعداء كان كويس برغم إنه إعتيادي و من السهل إنك تلاقي exploits تخلص عليهم واحد ورا التاني ..

الليفل التاني هو الذكاء الإصطناعي للmutants (مسوخ) اللي بصراحة كان ممتاز و من الصعب إنك تتوقع هجماتهم خصوصاً العناكب اللي هتقابلها في مرحلة معينة في اللعبة .. لكن يظل الAI بشكل عام أحد عيوب اللعبة و لكن مش مؤثر عالتجربة بشكل كبير.

ده العيب الوحيد اللي ممكن أذكره في الجيم بلاي الحقيقة اللي كان متنوع لحد كبير و فيه shooting ميكانيكس واقعية و ممتعة و بتاخد feedback مرضي و عظيم بيختلف من كل سلاح للتاني و بيديله هوية خاصة.

الجرافيك و الجوانب التقنية

ألعاب Shooter كتير الواحد إتربى عليها كانت بتقدم مستوى رسومي خارق و بيخلينا مبهورين طول فترة التجربة .. ألعاب زي Half Life 2 في 2004 أو BioShock في 2007 و منقدرش طبعاً ننسى العملاقة مدمرة الأجهزة ثلاثية Crysis .. الألعاب دي كانت رافعة سقف طموحات الواحد لدرجة كبيرة خلتنا نقول على رسوم ألعاب الشوتر في الجيل الحالي مجرد تطور فقط .. لكن و مع أول إعلان لMetro في E3 كنت متوقع مستوى رسومي هينقلنا لمرحلة تانية خالص ممكن نقول عليها لعبة الجيل رسومياً!

وبشكل غير متوقع محصلش أي نوع من أنواع الdowngrade اللي ممكن نذكره .. اللعبة طلعت جميلة زي ما جميع المتفائلين توقعوا! .. كمية الجمال والإبداع في كل ركن بتعدي عليه بتخليك في حالة إنغماس كبيرة جداً .. إنعكاسات الضوء في الصباح الباكر و تقنية الظلال كانت أروع ما يكون.

إهتمام اللعبة بالتفاصيل كان كبير جداً من تفاصيل وجوه الشخصيات الرئيسية في اللعبة لحد الشخصيات الجانبية .. التفاصيل دي أحياناً كانت بتعوض جمود حركة الوجوه (facial animations) و حتى هنلاحظ إن الmutants و الوحوش فيه تفاصيل كتير فيهم انت هتقدر تشوف مخالب الذئاب بكل وضوح و هتقدر تشوف شعرهم و أنيابهم كل ده كان مخلي التجربة immersion جداً.

طبعاً مع الإعتناء بالتفاصيل دي كلها بجانب مستوى الإضاءة الجبار و الdetails في الtextures خلى من اللعبة تحفة رسومية و لكن أصبحت ثقيلة جداً على الأجهزة المنزلية الstandard .. تجربتي اللي دامت أكتر من 35 ساعة كانت على جهاز الXbox One العادي و الحقيقة واجهت بعض التذبذب في أداء اللعبة من حيث الفريمات و لكن أغلب الأوقات الأداء كان مستقر على 30 فريم .. في بعض الأحيان لما بتدور أو تلف الكاميرا بتلاحظ إن اللعبة فيها مشكلة الPixlated Edges و هي إن الحواف بتلاقيها بتبدأ تبقى blurry جداً أثناء تدوير الكاميرا بسرعة.

بخلاف ذلك انا ممكن أعتبر اللعبة الأفضل على الإطلاق من ناحية الرسوم كلعبة shooter .. لكن هل المشاكل دي كانت مؤثرة بشكل مدمر للتجربة؟ .. من وجهة نظري لاء.

الأصوات

أصوات اللعبة مكنتش بالتميز اللي كان عليه الجيم بلاي و الجرافيك لكن بشكل عام مكنش سيء فا أقرب وصف ليه هو إنه كان بيقضي الغرض .. من ناحية التأثيرات الصوتية فا كانت رائعة الحقيقة و واقعية بشكل مفرط .. و أنصح بشدة إنك لما تجرب اللعبة تلعبها بheadphone لإن ده هيفرق في التجربة بشكل كبير .. لكن للأسف فيه أصوات منقولة copy paste من الأجزاء اللي فاتت كان من الأفضل إنهم يغيروا زي مثلاً صوت حركة artyom و انت بتمشي تحت الأنفاق كانت مش واقعية و مزعجة شوية.

الأداء التمثيلي للشخصيات كانوا المستوى متفاوت شوية .. كان فيه أداء لشخصيات ممكن نقول عليه جيد و شخصيات تانية ممتاز زي مثلاً Miler أو Anna أو Stapin أو Alyosha ..

الموسيقي و الsoundtrack الحقيقة كان توظيفهم عظيم في كل موقف بيعدي عليك خصوصاً المواقف كشف الأعداء لموقعك أو هروبك من الوحوش .. في كل موقف كان فيه موسيقى مناسبة برغم إن عددهم مش كتير.

الحكم النهائي  

بشكل عام لعبة Metro Exodus أقدر أعتبرها أفضل لعبة لعبتها في 2019 حتى الأن و قدرت تحجز مكان لنفسها لأفضل ألعاب السنة بدون شك .. التجربة لا تخلو من العيوب لكن لما ببص اللي قدمتوا اللعبة بشكل عام بلاقي إن قدامي تصميم عالم مفتوح مستغل جداً و خلى التجربة immersive مش زي ما بنشوف في ألعاب تانية كتير بتقدم عالم مفتوح على إنه وسيلة تكبير محتوى اللعبة بدون النظر لقيمة المحتوى نفسه .. بجانب مستوى الرسوم الجبار و القصة التفاعلية .. برجع أقول المشاكل دي تعتبر قذم قدام مميزات اللعبة

القصة : 9/10,  الجرافيك : 10/10,  الجيم بلاي : 8.5/10,  الأصوات: 8/10

9/10