افضل الالعاب المجانية على PS4
الالعاب المجانية على PS4 مش بس بتقدم متعة سواء في القصة او في اسلوب اللعب.. لكن كمان بتسهل اللعب الاونلاين مع اصحابك بسبب انك تقدر تلعبها اونلاين مجانا و في اي وقت.. و دلوقتي هنقولك افضل ألعاب مجانية تلعبها على PS4
Darwin's Project:
هي لعبة Battle Royale لكنها مختلفة عن النوع المعتاد لأنك بتواجه 10 لاعبين و في نفس الوقت بيكون عندك مهمات بقاء لازم تخلصها عشان تقدر تعيش و تكمل اللعب.. فـ هي معتمدة بشكل اساسي على الـCrafting و حفظ اسلوب لعب اللي قدامك.
اللعبة رتمها سريع و ممتع جدا و الجرافيكس فيها رائعة و بتحمسك للعب لعدد ساعات طويلة.
Path of Exile:
على الرغم من اصدارها في 2013.. الان ان لعبة Path of Exile واحدة من انجح الالعاب المستمرة في عالم الالعاب.
اللعبة من نوع الـRPG و بتدور في عالم سوداوي بتتحكم فيه بشخصيتك و بتلعب سلاسل كتير من المهمات و الـQuests اللي بتحكي قصص مختلفة في عالم اللعبة.
اللعبة بتتميز بعالم واسع و شيق و كمان شخصيات كتير و مختلفة.. و احداث القصص فيها درامية جدا و ممتعة.. دة غير تنوع الاسلحة و التخصيصات اللي بتضيفها لشخصيتك بمرور الوقت.
SpellBreak:
نرجع تاني لألعاب الباتل رويال.. لكن بردو لعبة Spellbreak مختلفة عن النوع الاعتيادي من الـBattle royale.. لعبة Spellbreak بتتحكم فيها بساحر.. و اثناء لعبك بتختارله قواه السحرية الخاصة اللي بتخلي كل شخصية في الجيم الواحد مختلفة عن التاني.. فـ بالتالي اسلوب اللعب هيختلف في كل جيم.
Call of Duty Warzone:
مفيش شك ان سلسلة Call of Duty افضل سلسلة ألعاب شوتنج في عالم الالعاب .. و على نفس النهج جات Warzone .. اللي جمعت كل عشاق ألعاب الـShooting في لعبة واحدة مجانية.
لعبة Warzone هي Battle Royale و بتعتمد بشكل كبير جدا على التكتيك و قدرتك على معرفة توقع حركات اللي قدامك .. و تكون عارف انت واقف فين و الاسلحة اللي معاك قدرتها ايه.. فـ من الارجح هتاخد بعض الوقت في انك تتعود عليها.. لكن بعد كدة هتكون افضل لعبة Shooting تلعبها.
تعتبر النقطة السلبية للعبة هي مساحتها الكبيرة و التحديثات الكتير.
Destiny 2:
هي لعبة Shooter looter فـ هتندمج معاها لوقت طويل جدا.. و الافضل انك تكون دايما بتلعبها مع اصحابك.. و اهم ميزة للعبة انك كل اضافة بتنزل للعبة بتكون بمثابة لعبة جديدة.. قصة جديدة بخريطة جديدة و شخصيات و اسلحة و اضافات جديدة كليا.
Rogue Company:
هي لعبة Shooting 5v5 برتم سريع.. بتختار فيها شخصيتك المفضلة و كل شخصية بيكون ليها قواها الخاصة اللي بتقدر تستخدمها اثناء اللعب.
كل جيم بيكون عبارة عن كذا Round و اللي بيكسب العدد الاكبر من الـRounds هو اللي بيكسب الجيم و في كذا نوع من الماتشات تقدر تلعبها و مع نهاية كل Round تقدر تحسن شخصيتك من الـShop لما تشتري الـItems المناسبة ليه.
اللعبة ممتعة جدا جدا خصوصا لو بتلعبها مع اصحابك كـSquad
Genshin Impact:
واحدة من اكتر الالعاب اللي عملت ضجة.. كونها لعبة مجانية.
اللعبة من نوع JRPG .. اللعبة فيها مميزات رائعة جدا شبه لعبة Legend of Zelda Breath of the Wild .. كمان اللعبة بتركز جدا على طور القصة.. و احداثها بتدور في عالم مفتوح مليء بالشخصيات و المهمات الجانبية.
و اثناء لعبك بتطور شخصيتك و مهاراتك.
دي بعض الالعاب المجانية اللي موجودة على PlayStation Store .. و كمان في العاب اكتر موجودة.. كل اللي عليك انك تتفرج على اللعبة و اعرف نوع الالعاب اللي بتحبه و نزّل الالعاب و إلعب و استمتع.. جرب الالعاب و شاركنا برأيك على صفحاتنا على فيسبوك و انستجرام.
