الالعاب قدرت انها تقدم فن و قيمة زيها زي السينما و المسرح و الموسيقى.. و القيمة دي هيحسها جدا كل الموجودين في عالم الالعاب و بحرها الواسع.

لكن هل ممكن تأثير الالعاب الايجابي يوصل لأبعد من كدة على الاشخاص و المجتمع و المحيطين بيه؟ و هل ممكن لعبة تكون مؤثرة على حياة شخص؟ او حتى تخدم قضية مهمة في المتجمع؟.. الاجابة هي أيوة.. الالعاب ليها تأثير ايجابي و فوايد. و في المقال دة هنذكر "بعض" التأثيرات الايجابية اللي سببتها ألعاب الفيديو.

• ازاي ممكن لعبة تساهم في الحفاظ على ارث تاريخي؟

دة اللي فعلا حصل وقت الحريق الشهير لكنيسة نوتردام في فرنسا عام 2019 و لأن الكنيسة من القرن 14 فـ كان شبه مستحيل الرجوع لتصميماتها الرئيسية في الترميم. في الوقت دة لجأت الجهة المختصة عن الترميم لشركة Ubisoft.. و بالتحديد للتصميمات الهندسية للعبة "Assassin’s Creed Unity" لأنها كانت مصممة الكنيسة في اللعبة بنسبة اقرب للواقع و بحكم انها احدث منتج استعرض الكنيسة فـ كان من المنطقي ان تصميمات اللعبة هتساعد في ترميم الكنيسة بشكلها القديم من 800 سنة و دة بالفعل اللي حصل... و ساهمت لعبة " Assassin’s Creed Unity" في حفظ التاريخ اللي طول عمرها بتستعرضه في ألعابها.

• تدريس التاريخ

لو حبيت تدرس حقبة تاريخية معينة في الاغلب هتقرا كتب تاريخية او هتشوف افلام وثائقية.. لكن عمرك ما هيجي في بالك انك تلعب لعبة! لكن بالظبط هي دي الفكرة اللي جت في دماغ هيئة تدريس جامعة "براج" في تشيك لما قررت تدرس حقبة المملكة البوهيمية في العصور الوسطى عن طريق لعبة "Kingdom come deliverance" بعد ما اتأكدت الجامعة من كل الاحداث التاريخية اللي تم ذكرها في اللعبة هي صحيحة و سليمة و مفهاش اي مغالطة .. و متقدمة بشكل خلى تدريسها لواحدة من اهم الفترات التاريخية في اوروبا سهل ممتنع لأي طالب.

• تدريس الطب؟؟؟!!

لحد النقطة اللي فاتت ممكن تقول عادي يعني ايه المشكلة؟ احداث تاريخية متقدمة في شكل لعبة.. في حاجات اصعب من كدة بكتير استحالة تبسطها الالعاب.

فعلا في حاجات اصعب من كدة زي الطب مثلا.. لكن ابدا مقدرش يمنع ابداع الالعاب في تطويعه.

كلية الطب في جامعة فلوريدا في امريكا صممت لعبة "RPG" بإسم "Elder Quest" مهمتها تدريس منهج امراض الشيخوخة و امراض كبار السن بشكل عام.

اللعبة حتى بتقدم عنصر قصة في اللعبة كونك طبيب بتتواجد في قرية في كبار سن مرضى كتير و كل واحد فيهم بيوصفلك الاعراض اللي بيحس بيها و انت مطلوب منك في اللعبة انك تشخص حالته بل و كمان توصفله ادوية! و اللي بيقدر طالب الطب انه يحضرها جوة اللعبة كمان..!!

و بكدة يقدر طالب كلية الطب انه يذاكر و يمتحن كمان و هو بيلعب.. يعني ماتستبعدش انك في يوم من الايام تلاقي دكتور بيوصفلك دوا عرفه من لعبة!

• تعليم اجيال المستقبل

كل اللي التعليم و التدريس اللي اتكلمنا عليه في النقط اللي فاتت كان كله للطلبة في مراحل تعليمهم النهائية.

طيب النشئ الصغير هيفضل يتعلم بالطريقة التقليدية العادية؟ لعبة "Minecraft" قالت لأ.

لعبة "Minecraft" هي واحدة من اوسع الالعاب التفاعلية انتشارا في التاريخ و اللي موجهة بشكل كبير للفئة العمرية الصغيرة من اللاعبين ..و حققت كل النجاحات اللي ممكن لعبة تحققها.. من ارباح لجوايز و حاجات تانية كتير.

و فعلا اللعبة اطلقت اصدارها الخاص بعنوان "Education Edition" و هو عبارة عن مناهج تعليمية في مجالات مختلفة زي العلوم و الرياضيات و اللغات .. حتى البرمجة و التصميم..!!

و في كل مجال متقسم منهج دراسي و موجه لفئة عمرية بعينها.. عشان بنهاية البرنامج التعليمي دة يكون الطفل قادر يكون فكرة عامة عن المادة العلمية دي.

• المساهمة في التوعية

مفيش اي استفادة مباشرة بتعود على اي حد من كونك قاعد في البيت و بتلعب. 

دة في العادي.. لكن وقت انتشار جائحة كورونا كان حتمي عليك انك تقعد في البيت لأن دة كان بيساهم في انقاذ حياة الناس.

شركة "اكس بوكس" حطت مسئولية على عاتق كل اللاعبين حول العالم لما اسست نظام "Microsoft Rewards" اللي بيخليك تلعب و تكسب جوايز تقدر تساهم بيها و تشارك "Microsoft" في تبرعاتها لمواجهة الفايرس. 

واصبح اللعب بالنسبة للجيمر مش مجرد تسلية قد ما هو بقى مساهمة في انقاذ الكثيرين.

مبادرة جميلة عملت زيها لعبة "PUBG Mobile" اللي اطلقت حملة و هي ان عدد الامتار اللي انت هتجريها جوة اللعبة هتتبرع قدامها "ببجي" بأموال لمواجهة كورونا و بدأت بتبرع بمليون دولار.. و كان كل لاعب يقدر يشوف هو جري قد ايه و المسافة اللي جريها اتحولت لقيمة قد ايه فلوس تم التبرع بيها.

و كان مثال رائع من "ببجي" على المساهمة و الدعم لكل اللي بيواجه الفايرس في العالم.

• التأثير المباشر للالعاب على الانسان.

ابحاث كتير اتعملت على ان ازاي الالعاب مضرة للمخ و بتسبب الادمان و التوحد و بتفقد الشخص مهاراته الاجتماعية و بتخليه منطوي و كسول و سلبي و..و..و

لكن في الحقيقة الالعاب ليها تأثير ايجابي و مباشر على المخ 

العالم Marc Palaus نشر بحث علمي في Frontiers in Human Neuroscience ناتج عن 116 دراسة علمية على تأثير الالعاب على المخ. الدراسات كانت بتركز على التغيرات الهيكلية للمخ و التغيرات الوظائف و السلوك.

و نتيجة الدراسات وضحت ان الشخص اللي بيلعب ألعاب فيديو بيتحسن عنده عنصرين للتركيز و هما التركيز الانتقائي و التركيز المستمر.. و بيحتاجوا طاقة اقل من المخ للتحفيذ. و ان الاجزاء المسئولة عن التركيز في المخ بتكون فعالة بشكل اكبر من المعدل الطبيعي في تنفيذ المهام المباشرة.

كمان الدراسة وضحت ان الفص الايمن في المخ و بالتحديد اللي مسئول عن المهارات البصرية و ادراك المكان حجمه بيكبر عند الشخص اللي بيلعب ألعاب فيديو على المدى الطويل.

و دة مكانش البحث العلمي الوحيد عن الموضوع دة

العالمة Isabella Granic الحاصلة على الدكتوراة من جامعة نيمخين في هولندا نشرت مقال في عام 2013 بتقول فيه ان ألعاب التصويب بتزود مهارات بيعينها عند المراهقين زي الادراك المكاني و التفكير و الذاكرة و مهارة حل المشكلات.

و ان المراهقين اللي بيلعبوا ألعاب فيديو بيتبعوا نمط معين في حل المشكلات بنفس الطريقة الاكاديمية اللي بيتم تعليمها في الجامعات لمواجهة نفس المشاكل! يعني حرفيا المراهق بيطبق اسلوب غيره بيتعلمه في الجامعة عشان يطبقه بنفس الكيفية.

دة بالنسبة لتأثير الالعاب على مخ الانسان.. لكن ايه تأثيرها على العلاقات الاجتماعية بين اللاعبين؟

في تقرير عملته وكالة Qutee و اتنشر في مجلة Forbes اتعمل على عدد من الجيمرز و اتسألوا اسئلة مباشرة عن الفوايد اللي بتعود عليهم من لعب ألعاب الفيديو.

نسبة 37% من اللي شاركوا في استفتاء الرأي دة اتضح انهم قابلوا على الاقل 5 اشخاص من اللي اتعرفوا عليهم من الالعاب .. بشكل زوّد المهارات الاجتماعية و خلى دايرة صداقتهم تزيد في وقت قليل.

دة غير اتفاقهم على ان الالعاب حسنت من مهارتهم الادراكية بشكل عام في حياتهم اليومية.

• تأثير صناعة الالعاب على الاقتصاد

في تقرير نشره الاتحاد الامريكي للاعبين AmericanGamingAssociation في يوينو 2018 قال وضح فيه ان صناعة الالعاب في الولايات المتحدة حصته تبلغ اكتر من 261 مليار دولار

و انها بتساهم في توفير اكتر من 1.8 مليون وظيفة منهم 727 ألف موظف مباشر في صناعة الألعاب.

و انها بتعود بـ40.8 مليار دولار للاقتصاد الامريكي عن طريق الضرايب.

دة طبعا في امريكا بس.. مع عدم رصد حجم اقتصاد الصناعة في دول اوروبا او حتى دول العالم العربي اللي بدأت تكون مساهم رئيسي في الفترة الاخيرة في صناعة الالعاب بمقرات الشرق الاوسط للشركات الكبيرة زي Ubisoft و CD Projekt Red و غيرهم.

في المقال دة حاولنا نستعرض حجم و تأثير الالعاب علينا و على اللي حوالينا.. و انها ازاي ممكن تكون متحكمة في صحة شخص .. او مهارته و شغله او حتى علاقاته مع اللي يعرفهم.

في النهاية احنا بنشكر كل لاعب بيستمتع بالألعاب و عارف انه شغوف بيها و مؤمن بإنها في يوم من الايام ممكن تكون محور حياته.