السر وراء كاريزما Max PAyne
في عصر ما قبل أرثر مورجان كان ماكس بين هو الشخصية المفضلة لقطاع كبير من اللاعبين، وده يرجع لأسباب كتير يمكن أهمها الكاريزما..طب هل المقصود بالكاريزما هنا انك لما كنت تدي لماكس بين أي أمر وليكن يضرب نار مثلاً مكنش يضرب علطول ويتأخر عليك شوية زي اللي بيتأخروا في الرد على الرسائل كده؟ بس ده وقتها هيبقى عيب تقني في اللعبة اسمه Input Lag مش كاريزما |
|
|
المقصود هنا بالكاريزما هي قدرة الشخصية على لفت انتباه الناس مع ترك أثر معين إيجابي يخليهم يفتكروه. والصفة دي مش معناها إن الشخص ده لابد يكون متعجرف أو بيتكلم عن نجاحاته وانتصاراته اللي حققها بصفة مستمرة بل العكس تماماً الناس بتحب تسمع أو تشوف الشخص الواقعي اللي بيمثل حياتهم وبيمر بمطبات كتير تلاقيه تارة يُهزم وتارة ينتصر وحياته عبارة عن Ups and Downs، مفيش انتصار دائم.. |
|
وده كان سبب رئيسي في سر كاريزما شخصية ماكس بين وتعلق الناس بيه، انه كان دايماً قادر على توصيل الاحساس ده، إستحالة في أي جزء من الـ 3 أجزاء كنت تقدر تتوقع انتصاره في النهاية أو الطريقة اللي هيمشي بيها السيناريو، ودايماً بتلاقيه عنده مشكلة ما مش قادر يتخلص منها وأبرزها طبعاً عدم قدرته على انه يتعافى أو يـ Move on من بعد موت زوجته، حدث زي ده رغم انه حصل في الجزء الأول هتلاحظ تأثيره في الجزء التاني أو التالت في أي مونولوج أو حديث لماكس بينه وبين نفسه، وده ساعد أكتر على ارتباط اللاعبين عاطفياً بالشخصية بشكل غير مسبوق في أي لعبة تانية |
أحد أسباب جاذبية ماكس باينسبب تاني مهم جداً في سر جاذبية ماكس هو الأداء الصوتي الأيقوني للشخصية اللي قام بدوره الممثل James McCaffrey، صوت بنبرة هادئة ومميزة تقدر تسمعه لفترات طويلة من غير ما تمل. وتقريباً كده ده بقى الممثل الوحيد اللي يقدر يقوم بدور الشخصية زي Kevin Conroy مع باتمان كده ومينفعش يتغير
|
|
|
كلنا نفسنا في جزء رابع لسلسلة أسطورية زي Max Payne وده ينقلنا لمعضلتين واقفين في طريق السلسلة، الأولى انها مقترنة ببطل واحد فقط زي Alan Wake اللي من تطوير نفس الاستوديو، فلو قصة ماكس أنتهت في أي جزء ده بيعني انتهاء العنوان تماما، ومش هيبقى في حل لإحياء اللعبة غير بـ reboot - إعادة تخيل السلسلة من جديد - أو الرجوع بالزمن للخلف، المعضلة التانية الأكبر ان حقوق العنوان مع روكستار اللي طبعا بتهتم جدا بالجانب الربحي والألعاب اللي بتقدر تكسب منها على المدى البعيد، وللأسف الجزء التالت من ماكس بين مكنش قد التوقعات تجارياً بالنسبة للشركة، وده بيستبعد رجوع السلسلة للساحة في أي وقت قريب.. |
