Saints Row هى أقوى منافس للعبه GTA
لحقيقه ان أقوى منافس انا شايفه للعبه GTA هى لعبه Saints Row
اول تجربه ليا مع السلسه كانت مع الجزء الثالث والى كان مبهر بالنسبالى لانى استمتعت بيه جدا على كل المستويات من أول القصه اللى كانت بتتكلم عن حرب العصابات ورغبة بطل اللعبه فى سيطره عصابته على المدينه, انتهاءاً بالجيم بلاى والجرافيكس وطريقه الشوتر الفكاهيه الى كانت جديده بالنسبالى فى الوقت ده.
ولاحظت إن اللعبه شبيه جدا بـ GTA وقلت لنفسى اللعبه حلوة لكن مش هتقدر تستمر لأنها مش هتتفوق على GTA، طب ايه الى ممكن تقدمه احسن من GTA؟
لكن لما الجزء الرابع من saints row نزل اتفاجئت جدا لانه كان مختلف تماما عن الجزء الى قبله من حيث كل حاجه صحيح انت بتلعب بنفس الشخصيات لكن بقدرات وأسلحه مختلفه تماما وبتسافر بيهم الفضاء
الجزء الرابع كان بيتكلم عن غزو فضائى للمدينة وانت مطلوب منك تحارب الفضائيين 
بعد ما اكتسبت قدراتهم الخارقه زى السرعه الفائقه والقدرة على القفز لمسافات طويله وصعود المبانى
اللعبه بقت شبيه بلعبه Infamous second son! وكانت حلوه جدا لانها مختلفه وساعتها قلت يا ترى الجزء الخامس ممكن يبقى عامل ازاى؟
واللي حصل انه فاجئني أكتر من الجزء الرابع لأنه كان فى الجحيم 
الجزء الخامس بتدور قصته عن مغامرة عصابتك فى الجحيم لمحاوله انقاذ احد افراد العصابه الى الشياطين خطفوه وهربوا بيه للجحيم
وبردو الجزء الخامس قدم اختلاف تام فى اسلوب اللعب والقدرات الخاصه بالشخصيات والاسلحه والبيئات الى بتلعب بيها وأهم اضافه من القدرات الى اتضافت هى القدره على الطيران وده بصراحه نقل متعه اللعبه لحته تانيه خالص 
الجزء الخامس كان مزيج غريب كده بين ألعاب الزومبى وألعاب الشوتر العالم المفتوح
يعنى تخيل كانك بتلعب GTA بس فى عالم كله زومبى 
بعد التجارب المتنوعه والمختلفه جدا الى اللعبة قدمتها انا متحمس جدا أجرب الجزء الجديد اللى المطورين أعلنوا انه هيبقى عوده لأصل اللعبة ولكن بجرافيك افضل كتير وقصه جديده واضافات جديده زى القدره على التفاعل بشكل اكبر مع البيئه المحيطه ليك فى اللعبه
ومع اجهزه الجيل الجديد الجيمبلاى هيكون سلس وممتع اكتر
يعنى هتلعب فى عالم واقعى وتخوض حرب العصابات زى الجزء الثاث وواضح إن اللعبة لسة مستمره فى منافسه GTA بقوة
