أزاي L.A. Noire كانت لعبة شرلوك هولمز اللي بنتمناها!
|
لما تعمل شرلوك هولمز في البيت، بس تطلع أحلى من شرلوك هولمز فعلاً! لعبة L.A. Noire كانت من روائع روكستار المنسية في الجيل السابع، لكن على الرغم من المستوى العظيم اللي قدمته في مستوى القصة والتحقيق ومحاكاة مسرح الجرائم بشكل واقعي غير مبتذل، إلا إن مكنش عليها نفس الزخم اللي حصل مع GTA IV أو حتى Red Dead Redemption 1 ..
لعبة L.A. Noire كانت مشروع طموح جداً من المطور Team Bondi، وفكرتها مبنية بشكل أساسي على التحقيق في الجرائم فقط، ورغم إن ده يعتبر أرض خصبة انها تكون لعبة تفاعلية محدودة في الجيم بلاي قائمة على الأختيارات فقط "Point and Click" زي ألعاب شرلوك هولمز الأخيرة مثلاً، إلا إن المطور كبر من ميزانية المشروع عشان يبقى عالم مفتوح وفي مطاردات وأكشن بنظام تصويب ميقلش كتير عن مستوى ألعاب روكستار في الحقبة دي..
 لكن ده مكنش سبب تميز L.A. Noire الوحيد عن الألعاب اللي تشبهها، فمثلاً لو قارنتها بـMafia 2 هتلاحظ إن عالمها حيوي أكتر وفي مهمات جانبية تقدر تعملها، مش مجرد مسرح كبير بتتنقل فيه عشان تقدر تخلص القصة الأساسية.
المطوريين أعتمدوا في تطوير اللعبة على تكنولوجيا جديدة في أنميشن تعبير الوشوش اسمها MotionScan واللي تعتبر تقنية متطورة من التقاط حركة الوشوش في الألعاب التانية، لأنها بتلتقط الحركة من جميع الجوانب وكمان بسلاسة عالية جداً عشان تزود من واقعيتها، كل التكاليف دي بتخدم هدف واحد انك تقدر تميز من تعابيير وش المتهم اذا كان صادق أو مُلتوي ومحتاج معاملة أشد أو بيكذب بثقة ولازم تطلع دليل ضده، اللعبة قدرت تعمل كده بإمتياز وكانت بتمثل مستوى تحدي بالنسبة للاعبين انهم يختاروا صح..
 جمال عالم اللعبة كمان كان استثنائي، مدينة Los Angelos بكل شوارعها ومعالمها المعروفة في الحقيقة كانت موجودة وبنفس الشكل بالظبط في اللعبة كأنك بتزورها فعلاً وفي نفس الفترة الزمنية، مع وجود 95 نوع مختلف من العربيات عشان تقدر تنوع براحتك أثناء تختيمك للعبة
قصة اللعبة كانت عنصر أساسي كمان في قوتها، وعلى عكس الأسلوب الروائي الساخر اللي أتبعته روكستار في معظم ألعابها وأشهرهم GTA طبعاً، L.A. Noire كانت جد جداً في نفسها وبتقدم قصة بتسلط الضوء على مشاكل اجتماعية وسياسية كانت موجودة في أمريكا في الأربعينات، زي مثلاً مناقشة الحرب بينها وبين اليابان في شكل فيديوهات flashback متقطعة من حياة بطل اللعبة كول فيليبس..
 اللعبة للأسف محققتش النجاح المنتظر في فترة نزولها والمطور Team Bondi أعلن إفلاسه بعد إصدارها بخمس شهور فقط عشان تُطوى صفحته في عالم الألعاب مع مستقبل مجهول لمشروع Whore of the Orient، رغم النهاية المؤسفة إلا إن روكستار افتكرت اللعبة ونزلها ريماستر في 2017
اللعبة فعلاً كانت تستحق اهتمام من الناس أكتر من كده، ونفسنا نشوف مشاريع جديدة من استديوهات تانية بتقدم أفكار جديدة زي ما عملت L.A. Noire
|
