في خلال المقال ده هنستعرض ليكم أفضل خمس ألعاب قدمت شخصية الفامبير أو مصاص الدماء، واللي يعتبر من أكتر المخلوقات الخيالية المثيرة للاهتمام نظراً لأنه تركيبة شخصيته معقدة وبتترك مساحة كبيرة للكاتب انه يبني عليه قصص ملحمية، غير القدرات الخارقة المدمرة بيتميز الفامبير انه جنتل وبرنس في نفسه وفيه جانب إنساني مش بيبقى كلياً Monster زي المخلوقات الـSupernatural التانية، الخمس ألعاب مينفعش تفوتهم لو عندك أي اهتمام بالشخصية دي:

لعبة Castlevania Lords of Shadow

تحفة كونامي وواحدة من أعرق الألعاب الهاك آند سلاش القصصية في تاريخ الجيمنج، صعب نقدر نرشحلك تبدأ منين لأن كل جزء في السلسلة أفضل من التاني، ولكن لو مش بتستحمل جرافيكس الألعاب الـRetro تقدر تجرب Lords of Shadow واللي تعتبر ريبوت للسلسلة زي ما حصل مع God of War في 2018، يعني بدون الحاجة للرجوع للأجزاء القديمة هتقدر تفهم رحلة "جابرييل بلمونت" في تجميع أجزاء القناع لإعادة إحياء زوجته المتوفية "ماريا".

لعبة Legacy of Kain: Soul Reaver

اللعبة مش هننكر انها فعلاً قديمة ونزلت بالتحديد في 1999، ورغم صعوبة انك تلعبها في الوقت الحالي بسبب الجرافيكس اللي عفا عليه الزمن لكن اللعبة مرشحة بقوة لأنها بتقدم قصة عبقرية والبطل فامبير وشخصيته مثيرة للاهتمام، السلسلة كلها ممتازة ولكن Soul Reaver بالتحديد ده أكتر جزء حصل على إعجاب من اللاعبين والنقاد.

لعبة Vampyr

اللعبة واضح من الاسم تجربتها بتركز على ايه، أحداث اللعبة في لندن والبطل الطبيبJonathan Reid بيلاقي نفسه في ظروف غامضة بيتحول لفامبير، ومن هنا بيبدأ رحلته في التعرف على سبب التحول والانتقام من السبب، وفى نفس الوقت اللعبة بتركز على البوصلة الأخلاقية للاعب بما ان مدينة لندن في الفترة دي كانت بتعاني من انتشار الحمى الأسبانية، وتقدر بصفتك طبيب انك تساعد لكن هل هيكون ده اختيارك ولا هتمص دم الأبرياء عشان تروي عطشك؟

رغم تباين الآراء حول مستوى اللعبة إلا ان فيها ميزة مهمة جداً وهي انها نزلت في 2018 فمش هتواجه في أي مشكلة في الجرافيكس

إضافة The Witcher 3 - Blood and Wine

المرة دي إضافة مش لعبة، بس إضافة بحجم لعبة كبيرة كمان لأنها بتقدم مدينة جديدة بشخصيات أول مرة هتشوفهم وجيرالت هيلعب مباراة اعتزاله في إصطياد الوحوش مع فامبير مختلف عن أي وحش واجهه طوال مسيرته وقادر على انه يدمر مدينة توسان الجميلة في خلال ثواني، الإضافة أكتر من عظيمة واللعبة حالياً نزلها أبديت جيل جديد مجاني عشان تقدر تلعبها بالجرافيك المعاصر

لعبة Vampire The Masquerade: Bloodlines

الكلاسيكية اللي بتستحق المركز الأول بجدارة لأنها أفضل من قدم شخصية الفامبير في عالم الألعاب على الإطلاق، اللعبة نزلت في 2004 وقدمت طفرة في عالم الـRPG وقتها وقدمت جميع فئات الـVampires اللي ممكن تخطر على بالك بشكل غير مسبوق مع جيم بلاي متنوع وقصة ممتازة!