الناس بتتكلم كتير اليومين دول عن تسريبات جديدة بخصوص جهاز كونسول جديد من Valve لمنصة Steam، واللي المفروض يكون قادر ينافس عمالقة السوق زي PS5 و Xbox Series X! 

الشائعات دي بدأت من آخر السنة اللي فاتت، لما انتشر كلام إن Valve شغالة على جهاز كونسول منزلي جديد، وفي نفس الوقت كانت بتطور إصدارات جديدة من يد التحكم Steam Controller وسماعة VR جديدة. بس كالعادة، الشركة مالتزمتش بأي تصريحات ومافيش أي تأكيد رسمي على الموضوع.

لكن الجديد بقى، إن المُسرب المعروف eXtas1s نزل فيديو بيأكد فيه إن الجهاز ده مش مجرد كلام، وإنه فعلاً قوي لدرجة يقدر ينافس الكونسولز الحالية! والمعلومة دي بقت أقرب للحقيقة بعد ما المُسرب HandleDeck كشف إن Valve بتشتغل مع AMD على معمارية RDNA4، وده بيعني إن الجهاز ممكن يكون في مرحلة التطوير دلوقتي!

بعد النجاح الضخم اللي حققته Valve مع Steam Deck كواحد من أفضل أجهزة الألعاب المحمولة، السؤال هنا: هل الشركة هتكرر نفس الإنجاز مع الكونسول الجديد؟ ولا المنافسة هتكون أصعب مع وجود عمالقة زي سوني ومايكروسوفت؟