قبل ما تشتري شاشة الجيمنج اتأكد من الحاجات دي كويس 

هو ايه الفرق ما بين الشاشات العادية والشاشات المخصصة للألعاب ؟

طبعاً شاشة عن شاشة بتفرق في حاجات كتير زي شدة الاضائة ونقاء الالوان وزاوية الرؤية ودول كلهم محددات مهمة جدا في اختيار الشاشة.

لكن اهم حاجات تركز عليهم وانت بتشتري شاشة للجيمنج هي:

الريزوليوشن هو عدد الPixels في الشاشة او للتوضيح عدد النقط اللي بتتكون منها الشاشة، وده بيفرق في حدة ونقاء الصورة.

عشان تفهم اكتر، تخيل معايا صورة معلقة على حائط مساحتها مثلاً متر في متر، الصورة متكونة مثلاً من ١٠٠ مربع بالوان مختلفة محطوطة جمب بعض.

لو قربت من الصورة هتشوف مربعات فقط ومش هتشوف شكل الصورة اصلاً، وكل ما تبعد اكتر هيبدأ يبان شكل الصورة.

طيب لو نفس الصورة اتكونت من ١٠٠٠ مربع، هيبقى كل مربع اصغر في الحجم والصورة هتبقى اوضح، وكل ما يزيد العدد هتبدأ متشوفش انهم مربعات وهتشوف انها صورة واضحة ونقية.

 احنى بننصح بدقة 4K عشان تكون مناسبة لأجهزة الجيل الحديث وجهاز الPS4 PRO

ده بقى اهم حاجة في وجهة نظرنا بتأثر على ادائك في اللعب، الInput Lag هو سرعة تنفيذ الشاشة للأمر اللي جايلها.

يعني لو بتلعب بكونسول مثلاً، لما تدوس على اي زرار بيتنفذ في وقت اد ايه على الشاشة.

وده بيفرق جداً في اغلب الالعاب واهمهم العاب الشوتينج لأنها بتحتاج رد فعل سريع منك عشان تلحق تضرب اللي قدامك قبل ما يلحق هو.

وكمان العاب زي الكورة، لما تلعب على شاشة الinput lag بتاعها قليل، هتتحكم اكتر بكتير في سرعة رد فعلك في ترقيصاتك وكل حاجة حارفيا.

 بننصح ان الInput Lag ميزدش عن 15 ميلي ثانية, ومع الاسف مش هتلاقي بوضوح الرقم من الشركة، لكن بننصح انك تدخل تشوف المواصافات من موقع rtings *

 ال Hertz:

الهرتز هو اقصى عدد صور تقدر تعرضة الشاشة في الثانية الواحدة (FPS)

زي ما اغلبنا عارف ان الڤيديو بيتكون من صور بتتعرض بشكل سريع ورا بعض، لدرجة ان العين مش بتقدر تشوف التقطيع ما بين كل صورة وصورة وبتظهر في الاخر على شكل حاجة متصلة وهي الڤيديو.

تخيل مثلاً ڤيديو لمدة ثانية لعربية سريعه بتعدي بالعرض في الشاشة، لو الشاشة مش بتقدر تشغل عدد كبير من الصور في الثانية الواحدة، هتشوف العربية على شكل خيالات ومش هتقدر تشوفها بشكل واضح تماماً، على عكس الشاشات اللي بتقدر تعرض عدد كبير في الثانية هتشوف الڤيديو بوضوح وهتحس انه انسيابي.

وده هو الFPS (Frame per second) عدد الاطارات (الصور) في الثانية الواحدة.

 احنا في الجزء ده بننصح ان الشاشة اللي هتشتريها تكون اكتر 120hz او اكتر عشان تدعم اجهزة الجيل الحديث زي PS5 و الXbox Series X *