كلنا عارفين من سلسلة أساسينز كريد انها بتسافر في كل جزء لحضارة مختلفة في حقبة زمنية معينة، ومن مميزات اللعبة انها بتحاول دايماً تظهر تراث الحضارة اللي بنزورها، في Unity بتشوف مظاهر الثورة الفرنسية وتأثيرها الثقافي على الناس في مدينة باريس اللي بتلاقيها أغلب الوقت مزدحمة، في Origins هتشوف الـEgyptian Gods وتقدر تواجهم لو عديت ليفل معين..

 

في Syndicate اللعبة بتروح لعصر الملكة ڤيكتوريا وأتسمى العصر ده على اسمها بالعصر الڤيكتوري، وكانت فترة نهضة لبريطانيا في أوج سيطرتها على العالم وكانت متقدمة في جميع المجالات بفرق رهيب عن باقي الدول..

 

لكن من أهم ما يميز الفترة دي تاريخياً في بريطانيا ظاهرة غريبة في عام 1888م ظهرت في حي "وايت تشابل" بشرق لندن حيث أكتشف جهاز الشرطة عدد كبير من الجرائم المتسلسلة بنفس طريقة القتل من سفاح بيستهدف نوع معين من الضحايا وهما بائعات الهوى، الشرطة فشلت في ربط الجرائم دي ببعض أو تعرف السبب أو ليه الشخص ده بيعمل كده..

 

أتسبب چاك في استقالة معظم رؤساء مركز الشرطة بسبب عدم مقدرتهم في العثور عليه، وأستمر في ارتكاب جرائمه لمدة 3 سنين تقريباً وكان عدد الضحايا اللي أنسبت إليه نظراً لوجود رابط هما 11 ضحية، ونحط تحت اللي أنسبت إليه كذا خط لأن وقتها مكنش في تقنية DNA في التحقيقات الجنائية وبيبقى صعب على جهاز الشرطة انهم يربطوا الجرائم ببعض..

 

 

في الإضافة بيبقى جاكوب فراي بطل اللعبة على معرفة بچاك وبيحقق في واحدة من جرائمه لكن چاك قدر يحدد مكانه وبيبدأ يطارده، الغريب إن اللعبة بتخلي الشخصية اللي بتلعب بيها چاك السفاح مش جاكوب، وده في حد ذاته كان تجربة جديدة وسبب ليه الإضافة دي مميزة لأن بيبقى عندك قدرات مختلفة تماماً عن الأساسينز فبدل ما بتكون القدرات دي في التخفي بتكون في الهجوم المباشر علناً، اللعبة في المراحل اللي بتلعب فيها بچاك بتكون أكشن مش Stealth

 

في مراحل تانية من الإضافة بتقدر تلعب بـ إيفي (توأم جاكوب) وبتبدأ في رحلة البحث عن چاك من خلال تفقد ضحاياه في مسرح الجريمة، بيتضح لإيفي مفاجأة فيما بعد إن السـ*فاح كان عضو في جماعة الأساسينز اللي كونها جاكوب في لندن وساب الجماعة وبدأ في استهداف بعض الأعضاء منهم في محاولة للانتقام نظراً انه كان شايف ان مؤسس الجماعة "جاكوب" هو السبب في موت أمه.

 

 

چاك في اللعبة كان قاتل عنده خبرة في استخدام الأسلحة البيضاء بسبب الفترة اللي قضاها مع جماعة الأساسينز، بينما قصته في الحقيقة غامضة حتى يومنا هذا ومش معروف هويته وليه كان بيعمل كده، فيما عدا ذلك كل التفاصيل اللي حصلت في أحداث اللعبة سواء أماكن أو أسماء الضحايا كانت هي نفس الحقيقة بالظبط عدا تغييرات طفيفة..

 

الاضافة تستحق تتلعب لو كان عجبك اللعبة الأساسية وعايز تعرف أكتر عن مجرم زي چاك اللي لحد دلوقتي ملفه متقفلش ونقطة سوداء في تاريخ الشرطة البريطانية