سوني قررت تقفل استوديو Firewalk المطورة للعبة Concord، اللي كان متوقع ليها نجاح كبير، وده هيكون إغلاق نهائي حسب إعلان سوني، و قررت اغلاق الاستوديو المطور لألعاب الموبايل Neon Koi بشكل نهائي.

سوني قررت تاخد اللعبة "Concord" من السوق وترجع فلوس كل اللي اشتروها، بعد ما اللعبة لقت استقبال مش كويس من اللاعبين. ده بعد اسبوعين بس من إطلاقها في أغسطس 2024. سوني قالت إنها كانت بتفكر في إرجاع اللعبة بشكل جديد، لكن في بيان يوم التلات 29 اكتوبر، أكد Hermen Hulst المدير التنفيذي لشركة بلايستيشن، إنهم قرروا ما يكملوش مع اللعبة دي.

هولست قال كمان: " بالنسبة لـ Firewalk، زي ما أعلننا في بداية سبتمبر، في حاجات في Concord كانت ممتازة، لكن حاجات تانية ما عجبتش عدد كفاية من اللاعبين، وعلشان كده وقفنا اللعبة." وأضاف: "إحنا قضينا وقت طويل بنستكشف كل الخيارات المتاحة قدامنا. بعد تفكير كتير، قررنا إن أفضل طريق هو وقف اللعبة بشكل نهائي."



هولست شكر كل فريق Firewalk على جهدهم وروحهم الإبداعية. وقال: "مجال الألعاب اللي فيها قتال لاعب ضد لاعب بيتطور بسرعة، ومع الأسف، اللعبة دي ما حققتش الأهداف اللي كنا حاطينها. هنتعلم من درس Concord ونكمل نطور قدراتنا في الألعاب اللي بتشتغل على الإنترنت علشان نحقق نمو في المستقبل."

كمان هولست أشار لصعوبة القرار، خاصة مع زملاء وأصدقاء هيغادروا الشركة. وأكد إنهم هيسعوا يلاقوا فرص للموظفين المتأثرين في أماكن تانية ضمن شركاتهم العالمية.

هولست بيؤمن بقوة الأبتكار والتجارب الإبداعية وتطوير العناوين الجديدة. لكنه أكد على أهمية النمو المالي المستدام، خاصة في الظروف الاقتصادية الصعبة.



استديو Firewalk تأسس في 2018 في واشنطن، وسوني اشترتها سنة 2023. و Concordكانت أول لعبة لهم، وكانت في التطوير لمدة حوالي 6 سنين. اللعبة حصلت على تقييمات مختلطة أو متوسطة من النقاد، وفقًا لموقع Metacritic ، اللي أعطاها تقييمات 62 (PS5) و 65 (PC). وفقًا للتقارير، اللعبة باعت حوالي 25,000 نسخة بس.